Onte pola tarde, Navantia publicou as listas provisorias do exame teórico-práctico das tres especialidades pendentes (Asistencia á dirección, Bacharelato e Mecatrónica) da convocatoria de prazas de operarios e empregados júnior 2019.  

Finalmente, Navantia excluíu a 4 persoas que nese exame sacaron a nota suficiente para obter praza (que é o que recollen as bases), pero que non obtiveron o "visto e prace" dun psicólogo contratado por Navantia para facer algunhas entrevistas persoais telemáticas (entrevista que non aparece por ningures nas bases, e que tampouco se lle fixo a tódolos candidatos). Noutras palabras: Navantia viola as bases da convocatoria.  

Este nivel de nepotismo empresarial son, infelizmente, habituais no sector privado. Pero que ocorran nunha empresa pública é gravísimo. Neste senso, a CGT defendeu na permanente do comité de Ferrol a convocatoria inmediata dunha asemblea xeral para abordar co conxunto dos traballadores/as toda esta situación, proposta que lamentablemente non saíu adiante.  

Pero non se trata só de loitar para solucionar este caso. Hai que impedir que isto volva a repetirse. Trátase de acabar con tódalas irregularidades, escurantismos e arbitrariedades que se producen nas contratacións de Navantia, e que, no caso das prazas de titulados universitarios, veñen de lonxe.  

Non hai nada que inventar. Navantia é unha empresa pública. Por tanto, debe seguir os procedementos transparentes e obxectivos propios da Administración pública.  

Mentres a SEPI, matriz de Navantia, convoca prazas de titulados universitarios rexidas polo principio de igualdade, mérito e capacidade, Navantia exclúe xente por motivos escuros que oculta trala escusa do secreto clínico dun psicólogo. Ou por exceso de coñecemento, como pasou nas prazas de universitarios júnior.  

A CGT vai facer todo o que estea na nosa man para loitar contra esta cacicada e para que a arbitrariedade desapareza de Navantia, deixando paso a uns procesos de ingreso transparentes e nos que haxa unha igualdade de oportunidades real conforme ós principios de igualdade, mérito e capacidade, e de non discriminación entre homes e mulleres, como corresponde a unha empresa pública.  

Sección Sindical Unitaria de CGT en Navantia-ferrol

As listas provisorias do exame teórico-práctico de 3 especialidades (Asistencia á dirección, Bacharelato e Mecatrónica) da convocatoria de prazas de operarios e empregados júnior 2019 de Navantia seguen pendentes de publicación.

O motivo é a intención da empresa de excluír a 4 aprobados destas tres especialidades. A xustificación de Navantia é que un psicólogo que os entrevistou por Skype así o recomenda.

Por que o psicólogo non considera aptas a esas persoas? Non se dan explicacións concretas. Alúdese simplemente a unha serie de posibles causas xenéricas como, por exemplo, a inmadureza persoal. Ou sexa, Navantia convoca prazas júnior ás que te podes presentar con 18 anos… e despois pode que non che dea a praza alegando que es inmaduro!!! Isto é surrealista. 

A actuación de Navantia en todo este proceso é impresentable. Está MALTRATANDO ós aspirantes, que nin se merecen nin teñen por que aturar as arbitrariedades e a falta de transparencia de Navantia, que aínda por riba é unha empresa pública, malia que non o pareza vendo como actúa a xefatura de RRHH. O último (que non derradeiro, por desgraza) exemplo témolo nas listas provisorias das 6 especialidades que si se publicaron: sen nota do exame (que determina o obter praza ou non) e desordenadas, de forma que un aspirante non puido saber cal era a súa situación relativa na lista, a canto estaba da derradeira persoa que obtiña praza, etc., informacións fundamentais de cara a unha posible reclamación.

Esta mañá houbo unha reunión coa dirección de RRHH de Navantia. A postura sindical maioritaria é que, sen unha explicación que o xustifique, non se admitirá as exclusións. Para a CGT é insuficiente: non imos admitir a exclusión de ninguén porque unha entrevista persoal é un método de selección SUBXECTIVO.

Isto non pasaría se CCOO, MAS e UGT, que constitúen a maioría sindical do comité de empresa, defendesen uns procesos de selección baseados exclusivamente en probas obxectivas e nos principios de igualdade, mérito e capacidade.

E tampouco pasaría se a maioría sindical non lle permitise a Navantia andar cambiando as regras do xogo á súa comenencia, como pasou neste caso: a entrevista non aparece nas bases da convocatoria e, por tanto, significa violalas.

Esiximos a publicación inmediata das listas provisorias sen exclusións e a continuación do proceso, a fin de que poida producirse canto antes o ingreso dos novos compañeiros e compañeiras.

Sección Sindical Unitaria de CGT-Navantia

Navantia publicou onte, martes 27, as listas provisorias da 3ª proba (exame teórico-práctico) da convocatoria de prazas de operarios e empregados júnior 2019.

Só se publicaron as listas de seis especialidades. Outras tres (Asistencia á dirección, Bacharelato e Mecatrónica) quedaron pendentes.

A causa disto é que entre os APROBADOS destas tres especialidades hai persoas que na 2ª proba (test psicotécnico) obtiveron un resultado que a empresa calificou como "llamativo". (O que non se sabe é que lle chama a atención, aínda que nolo podemos imaxinar).Navantia pretende que, antes de decidir se lles dá unha praza ou non, estas persoas teñan que pasar porunha entrevista persoal.

A CGT rexeita totalmente toda proba de acceso NON OBXECTIVA (tests de personalidade, entrevistas persoais…).

O que pretende Navantia é trasladar ás prazas de operarios e empregados o modelo de selección SUBXECTIVO, ARBITRARIO E SEN TRANSPARENCIA que utiliza historicamente nas prazas de técnicos superiores, tamén nas que están saíndo nos últimos meses.

Ademais,neste caso concreto a entrevista persoal representaría unha violación das bases da convocatoria porque non está contemplada nas mesmas.

A pretensión de Navantia equivale tamén a aplicar retroactivamente o resultado da 2ª proba… a persoas que xa fixeron e aprobaron a 3ª. IMPRESENTABLE!!!

Esiximos a PUBLICACIÓN INMEDIATA DAS LISTAS PENDENTES E A CONTINUACIÓN DO PROCESO.

Isto non pasaría se CCOO, MAS e UGT, que constitúen a maioría sindical do comité de empresa, en vez de aceptar, como fixeron, esta aberración, defendesen uns procesos de selección baseados exclusivamente en probas obxectivas e nos principios de igualdade, mérito e capacidade.

Non facelo significa que as cousas poden descorrer por canles non previstas, como xa lles pasou con toda a argallada do baremo e a nota de corte da 1ª proba.

Sección Sindical Unitaria de CGT en Navantia-Ferrol