A CGT de Ferrolterra apoia a concentración do xoves 21 en defensa dun transporte público e de calidade

19 de octubre de 2021 autor: Federación Local Obrera A Coruña Categoría: actualidad, Ferrol, Social Tagged concentracións, Convocatorias, Monbús, Transportes, Xunta

Este vindeiro xoves, día 21, haberá unha nova concentración dos usuarios e usuarias da liña de buses Ferrol-A Coruña, que están sendo maltratados (non hai outra maneira de calificalo) polas decisións tomadas pola empresa Monbús, decisións que non se toman pensando no benestar dos usuarios/as, senón nos beneficios dos propietarios e accionistas da empresa.

Tamén cabe denunciar a actitude cómplice da Xunta do PP, que, tras adxudicarlle o servizo a Monbús, agora tolera que a empresa maltrate ós pasaxeiros e pasaxeiras, con situacións tan inaceptables como deixalos tirados de forma repetida.

O problema prexudica especialmente ás persoas que utilizan a liña, especialmente traballadores/as e estudantes, tanto da universidade como do ensino medio.

Esta situación vén sumarse ó penoso estado do transporte ferroviario entre a nosa comarca e A Coruña, que leva anos sometido a unha degradación consciente por parte dos diferentes gobernos.

Todo isto responde a un interese en fomentar o transporte individual fronte ó transporte colectivo, para así beneficiar ás grandes empresas, xa sexan as petroleiras, as automobilísticas ou os propietarios da AP-9, cuxa concesión foi prorrogada ilegalmente polo PP para que seguisen amasando cartos; algún día saberase a cambio de que, pero nolo podemos imaxinar.

A Confederación Xeral do Traballo chama a tódolos traballador@s e estudantes de Ferrolterra a acudir á concentración prevista para este xoves 21 ás 8 da tarde no edificio da Xunta.

Basta de abusos das empresas privadas!

Por un transporte público e de calidade ó servizo da cidadanía!

CGT en Ferrolterra

Concentración pola xustiza social

30 de junio de 2021 autor: Federación Local Obrera A Coruña Categoría: A Coruña, actualidad, Sindical, Social Tagged Comunicados

A CGT da Cotruña convoca á súa afiliación, simpatizantes e cidadanía en xeral a unha concentración que terá lugar o martes, 6 de xullo, ás 19:30 horas, no Obelisco da Coruña baixo o lema «Pola xustiza social. As persoas antes que o capital».

POLA XUSTIZA SOCIAL: AS PERSOAS ANTES QUE O CAPITAL

A situación da clase traballadora é insostible: catro millóns de persoas no paro e o resto sometidas a horarios interminables, salarios de miseria, contratos precarios, colas da fame, expulsadas das súas vivendas e condenadas a unha existencia moi pouco merecente de ser vivida.

Millóns de horas extraordinarias, pagadas e sen pagar, que servirían para crear centos de miles de postos de traballo. Xornadas de traballo legais que non se reducen desde hai 40 anos. Unhas xubilacións cuns requisitos cada vez máis duros non só para ter dereito a elas, senón tamén cunha idade de xubilación máis tardía e uns sistemas de cálculo pensados só para reducir o seu importe. Mentres milleiros de xoves agardan por un posto de traballo, outros prolongan a súa vida laboral ata que non poden máis e pasan directamente do posto de traballo ás portas da morte. Por todo isto reclamamos traballar menos: menos horas, sen horas extraordinarias e cunha idade de xubilación máis temperá. Traballar menos, para traballar todas e todos.

Temos un salario mínimo de miseria, do que dependen millóns de traballadores e traballadoras, e este ano aínda non subiu. As diferencias salariais son enormes, sen ningunha equidade. Os salarios non cobren, en moitos casos, os gastos mínimos para ter unha vida digna de ser vivida. Os ricos son cada vez máis ricos e continúan enriquecéndose durante esta pandemia. É unha cuestión de xustiza que os traballadores e traballadoras poidan sufragar co seu salario os gastos de vivenda, alimentación, enerxía, abrigo, cultura e ocio sen estar afogados día tras día, mes tras mes. Por todo isto reclamamos un salario mínimo digno e suficiente, o peche dos abanos salariais e a repartición da riqueza equitativamente. En definitiva: estamos polo reparto da riqueza e do traballo.

Por iso non é suficiente a derrogación da reforma laboral de Rajoy. Esta reforma foi nefasta, pero é que é nefasta a xeneralidade da lexislación laboral: contratas, subcontratas e ETT; contratación temporal á carta; despedimentos libres a gusto do empresariado; accidentes de traballo disparados; subsidios de desemprego miserentos e todo tipo de falcatruadas consentidas legalmente por este sistema inicuo e inxusto en beneficio dunha minoría cobizosa e insaciable. Por isto reclamamos a xustiza social, un sistema social xusto no que a clase obreira, a creadora da riqueza, teña o recoñecemento que merece e deixe de padecer esta vida cativa e ruín. Porque humanamente é insostible este sistema que pon o capital por riba das persoas. Porque hai que desmontar toda a lexislación actual e non conformarse coa maquillaxe que poidan supoñer unhas simples modificacións e derrogacións.

Traballar menos para traballar todas e todos

Polo reparto da riqueza e do traballo

As persoas antes que o capital

Pola xustiza social

CGT da Coruña

¡Kropotkin, en Pontevedra! Xornadas e Exposición no 100 cabodano da súa morte

23 de marzo de 2021 autor: pontevedra Categoría: actualidad, Pontevedra, Social

Organizadas polo Ateneo Libertario de Pontevedra, coa colaboración de CGT, terá lugar en Pontevedra, durante os meses de marzo e abril, a celebración dunha Exposición e diversos actos en homenaxe ó gran anarquista ruso Piotr Kropotkin (Moscú, 1842 – Dmitrov, 1921) con motivo de l00 cabodano de súa morte.

As proxeccións fílmicas, o club de lectura e o obradoiro de cartaces terán lugar na sede do Ateneo Libertario de Pontevedra (rúa Pasantería 1, 3o andar), mentras a Exposición e as charlas terán lugar na Sala VerSus da Fundación Cuña-Casasbellas (r/ Gerardo Álvarez Limeses, nº 12).

Programa

25 de marzo, ás 19:00h – Inauguración da Exposición na Sala VerSus da Fundación Cuña-Casasbellas. Presentación a cargo de Anna Kulyk e Miguel Á. Cuña + Actuación musical de Adán e Clarisa.

Na Exposición: libros e debuxos de Piotr Kropotkin; xornais, revistas e fotos de finais do século XIX e comezos do XX; obras orixinais de Anna Kulyk, Adán Solla, Clarisa Pereira, Grupo Anarquista Higinio Carrocera e outros artistas anónimos; material audiovisual de Herman Axelbank e do funeral de Kropotkin (autores descoñecidos).

A través das fotografías, mapas, pinturas, panfletos, cartaces, debuxos, xornais, arquivo audiovisual, libros, obras orixinais feitas polo Ateneo e todo tipo de materiais relacionados coa vida e a obra de Kropotkin -e do movemento anarquista internacional entre 1842 e 1921 (e máis alá)-, amósanse os acontecementos destacados da súa vida, así como se resaltan as súas ideas e reflexións sobre os asuntos máis importantes do seu tempo -e aínda actuais no noso-: o cárcere, a loita revolucionaria, o concepto de anarquismo, o antimilitarismo ou a importancia do apoio mutuo para o desenvolvemento humano.

26 de marzo, ás 19:00h – Charla, a cargo do historiador Eliseo Fernández: "Kropotkin na Galiza: recepción e influencia do pensamento kropotkiniano no anarquismo Galego".

27 de marzo, ás 19:00h – Charla a cargo de Jordi Maiz: "El anarquismo de Piotr Kropotkin (1842-1921): activismo, compromiso y legado". Jordi Maiz é historiador e profesor en Baleares da UNED e Instituto, autor entre outros libros de "El otoño de Kropotkin. Entre guerras y revoluciones (1905 – 1921)

7 de abril, ás 19:00h – Proxección do film "Winstanley" (Kevin Brownlow, 1975, Inglaterra, 95 min.)

14 de abril, de 16:00h a 22:00h – "Obradoiro de fabricación de cartaces", Alouette machine. É necesaria inscrición previa. Prazas limitadas.

21 de abril, ás 19:00h – Proxección "Casas Viejas: el grito del sur" (Basilio Martín Patino, 1997, España, 62 min.)

28 de abril, ás 19:00h – Clube de lectura "O apoio mutuo. Un factor de evolución".

1 de maio, ás 20:00h – Concerto: Columna vegana (PoP LiBertario) + artista invitada. Lugar do concerto pendente de confirmación.

Mes de maio – Pendentes de confirmación palestras, obradoiros, proxeccións e lecturas.

Os venres, 9, 16, 23 e 30 de abril, a partir das 19:00h, haberá visitas guiadas da Exposición, a cargo do Ateneo Libertario de Pontevedra. A Exposición "Kropotkin" permanecerá aberta ó público na Sala VerSus, de martes a venres dende as 5,30h da tarde a 21:00h.

Ateneo Libertario de Pontevedra

CGT Pontevedra