Xa hai sentenza no caso da candidata a unha praza de TS júnior excluída por "exceso de madureza e exceso de coñecemento profesional": o xuíz desestimou a súa demanda.

Por unha banda, o xuíz establece que Navantia pertence ó sector público e, por tanto, o acceso debe rexerse "polos principios de igualdade, mérito e capacidade", afirmación que sustenta na lexislación vixente e en sentenzas do Tribunal Supremo. Tamén considera probado que a demandante obtivo unha das mellores puntuacións.

Pero pola outra, cómpralle o discurso á empresa e di que, como eran prazas júnior, "cobra sentido" excluír á demandante por ter un perfil sénior. E isto a pesar de que despois se presentou a sénior e Navantia non a admiteu.

¿As sentenzas dependen de que algo "cobre sentido" para o xuíz que che toque? ¿"Cobrar sentido" é un argumento xurídico? Pero é que, ademais, á vista dos datos coñecidos no proceso, a exclusión NON "cobra sentido".

Os admitidos foron sometidos ó seguinte proceso: unha dinámica de grupo, unha entrevista persoal con RRHH e unha entrevista técnica. A demandante fixo as dúas primeiras e foi excluída da última.

Na dinámica de grupo se valoraron sete aspectos: 1) Traballo en equipo, 2) Flexibilidade, 3) Iniciativa, 4) Perseveranza, 5) Capacidade resolutiva, 6) Comunicación e 7) Madureza. Cada un deles se puntuaba de 0 a 3 puntos, o que implica que a puntuación máxima eran 21 puntos.

A excluída obtivo 20 puntos, supostamente demasiados; a entrevista confirmou o visto na dinámica. Pero resulta que na empresa ingresaron persoas que obtiveron os 21 puntos. Como se come isto? Navantia debería explicalo.

Tamén se coñeceu outro dato interesante: o mesmo departamento de RRHH que exclueu a unha persoa con 20 puntos, permiteu que continuase no proceso outra que obtivo só 2 puntos! Outro dato: a puntuación máis baixa entre as persoas que entraron na empresa foi de 6 puntos.

Navantia debería explicar como fixo a selección porque se todo isto xa cheiraba antes, agora cheira moito máis. Os feitos cantan que, en vez de partir dos postos de traballo vacantes e buscar para eles os perfís profesionais axeitados, RRHH seleccionou perfís persoais e despois buscoulles encaixe na empresa. Por iso algún candidato tivo que facer ata tres entrevistas técnicas. De feito, o xefe da Sala Técnica queixouse de que algúns candidat@s que lle enviaba RRHH non tiñan o perfil profesional axeitado.

A actuación de Navantia é escurantista e arbitraria. Pero, como no caso dos excluídos polo psicólogo nas prazas de operarios-empregados júnior, os compañeir@s que obtiveron praza non teñen culpa.

A compañeira excluída vai recorrer a sentenza. Esperemos que lle toque un xuíz con outro "sentido".

A CGT vai seguir loitando a favor dun procesos de acceso XUSTOS, TRANSPARENTES E OBXECTIVOS, como corresponde á empresa pública.

Sección Sindical Unitaria da CGT en Navantia-Ferrol

Hoxe houbo unha reunión empresa-comité sobre as convocatorias de prazas en marcha.  

A primeira preocupación da CGT foi a publicación dos dous horarios de exame e as profesións correspondentes a cada un deles, ademais do lugar da súa realización.  

A resposta da empresa foi inaudita: ¡que o horario do exame de cada profesión o tiña que establecer os vogais do tribunal correspondente e, por tanto, había que esperar a que se reunisen! E isto a catro días laborables da data do exame!  

A CGT argumentou que o papel dos vogais era a elaboración e corrección dos exames, non a organización dos aspectos prácticos dos mesmos, que as profesións tiñan que ser agrupadas de determinada maneira (a fin de garantir que as persoas inscritas en dúas puidesen examinarse de ambas) e que os vogais nada sabían deste aspecto, e que o lóxico era que os horarios se decidisen na Comisión de Emprego entre empresa e comité.  

Non houbo maneira. A empresa non se moveu da súa postura. Pero horas máis tarde tivemos coñecemento de que a empresa enviou onte un correo a tódolos vogais indicando a que hora sería o exame de cada especialidade. Isto xa non ten nome. Ou mellor dito, si o ten: INDECENCIA.  

Hai que ter moi mala baba para, estando establecidos xa os horarios, non querer publicalos. Esta é unha proba máis de como trata Navantia ós aspirantes. Ou mellor dito, de como os MALTRATA, e o fai DE FORMA SISTEMÁTICA E DELIBERADA. Os aspirantes non se merecen isto.

Moito vídeo, moita foto en redes sociais, moito vender imaxe de cara á opinión pública, pero a auténtica cara da xefatura de RRHH de Navantia é a que demostran estes feitos: un total desprezo polos traballadores e traballadoras.  

Navantia ten que publicar os horarios e o lugar dos exames XA! 

E o PSOE e Unidas Podemos deberían empezar a preocuparse polas falcatruadas que, no seu nome, organizan uns responsables de RRHH que non desentoarían nada cun goberno do PP-Vox.  

Sección Sindical Unitaria de CGT en Navantia-Ferrol

Sección Sindical Unitaria de CGT en Navantia – Ferrol