Os traballadores e traballadoras ferroviarias das empresas ADIF e RENFE están chamados a secundar Folga os vindeiros días 31 de xullo e 1 de agosto. En coincidencia con esas datas, a CGT da Coruña convoca unha Concentración contra a privatización do ferrocarril, contra a venda do público e por un ferrocarril público e social. Terá lugar o xoves 31 de xullo na estación de tren da Coruña, ás 11 horas.
Concentracións, paros e manifestación contra o ERE en Atento na Coruña
Os traballadores e traballadoras de Atento seguen a loitar contra un ERE que supón o despedimento de máis de 800 persoas nos centros de traballo de toda España. Na Coruña trátase do despido de 49 persoas, nunha empresa que ten millonarios beneficios, reprime e maltrata aos empregados e empregadas, e mantén unhas condicións de traballo e salariais de miseria.
O persoal da Coruña está loitando contra esta situación desde hai meses e ven promovendo mobilizacións nos últimos tempos, tanto concentracións como manifestacións, paros por quendas e de 24 horas, etc.
Esta semana é crucial, porque se está a esgotar o prazo forzoso de negociación. A CGT rexeita este ERE por ser fraudulento, por facerse con argumentos falsos e sen causa ningunha. Por isto, a CGT convoca a todos os traballadores e traballadoras, e a toda a clase obreira coruñesa, a dúas concentracións diante da sede da empresa na rúa Juan Flórez da Coruña, ás 12:00 e ás 18:00 horas de mañá, día 22, martes.
O próximo xoves, día 24, a CGT convoca un paro de 24 horas para enfrontarse a esta agresión da empresa e unha manifestación que sairá ás 12:00 horas desde o cento de traballo.
Folga e manifestación na Coruña contra o ERE en Atento
O martes 15 de xullo, os traballadores e traballadoras da empresa Atento, filial de Movistar ata finais de 2012, están chamadas a un paro de 24 horas en todo o estado para amosar o seu rexeitamento mais enérxico ao ERE presentado pola empresa, que pretende despedir a mais de 800 traballadores e traballadoras, 49 deles na Coruña. Coincidindo coa xornada de folga, a CGT ten convocado unha manifestación a partir das 12:00 horas que sairá desde Atento, na rúa de Juan Florez 80- 82.
O ERE encóntrase en proceso de negociación e ata hoxe se celebraron tres reunións nas que a empresa trata de xustificar o despedimento argumentando falsas causas económicas, productivas e organizativas. A CGT denuncia que Atento xera beneficios e que a carga de traballo é cada vez maior nos últimos meses, ao tempo que responsabiliza a Movistar de precarizar cada vez mais as condicións laborais e destruir emprego estable a través de empresas como Atento ou Extel. Lembramos que o plantel de ambas contratas leva realizando mobilizacións desde xaneiro, reclamando o cesamento das presións, abusos, ameazas e despedimentos inxustos e arbitrarios, todo isto froito das directrices que marca Telefónica.
Read More
15 de xullo: Folga en Atento contra o ERE
Como resultado das Asembleas de traballadoras e traballadoras realizadas o pasado día 4 de Xullo en todos os centros de traballo a nivel estatal, a CGT convoca Folga de 24 horas para o vindeiro día 15 de xullo, en coincidencia coa cuarta reunión da Comisión negociadora.
Dende a CGT entendemos que non é momento de medias tintas, é moito o que nos xogamos e, entre todos e todas, debemos loitar para frear este ERE inxusto e inxustificado.
Tras a campaña de mobilizacións que levamos a cabo dende principios de ano, e que culminou coa folga de 24 horas do pasado 23 de xuño, os traballadores e traballadoras teñen trasmitido, a través das asembleas convocadas, que non hai que afrouxar o paso na loita. Se a situación era mala o día 23 de xuño, a día de hoxe é crítica.
Agardamos que todos os sindicatos con representación en Atento esteamos unidos pola defensa dos 823 postos de traballo que Atento quere destruír.
Ademais, os vindeiros martes 8 de xullo e xoves 10 de xullo haberá concentracións diante da empresa ás 11 e ás 18 horas.
Agora, máis que nunca… Non ao ERE en Atento, nin un paso atrás.
Sección Sindical da CGT en Atento na Coruña
O ERE presentado en Atento supón 823 despedimentos
No día de hoxe, xoves 3 de xullo, celebrouse en Madrid a primeira reunión do período de consultas do ERE (Expedente de Regulación de Emprego) que a dirección de Atento Teleservicios España ten presentado. A partir de hoxe ábrese un prazo de negociación non superior a un mes no que, según a lei, débese traballar para "evitar ou reducir" os 823 despedimentos que a empresa pretende executar.
Para a CGT esos 30 días son o prazo que temos os traballadores e traballadoras para obrigar a ATENTO a retirar este ataque salvaxe aos nosos postos de traballo. Desde a CGT non aceptamos nin asumimos as causas que hoxe expuxo a dirección da empresa.
A propuesta da empresa por provincias é: Barcelona, 131 despidos; Lleida 25 despidos; Madrid, 187 despidos; Cáceres, 11 despidos; Bilbao, 69 despidos; Córdoba, 36 despidos; Sevilla 63 despidos; Jaén, 45 despidos; León, 48 despidos; Toledo 92 despidos; Valencia, 67 despidos; e A Coruña, 49 despidos.
Os criterios que propoñen para seleccionar aos compañeiros/as son subxectivos, arbitrarios e fácilmente manipulables. Como exemplo, pretende que aspectos como o TMO, ou estar de baixa por enfermidade sexan criterios obxectivos para despedir. Os criterios poden variar ao longo destes 30 días, polo que nestes momentos non hai ningunha lista de compañeiros/as que vaian a ser despedidos/as. Se teñen fixado os martes e os xoves como día de reunións durante todo o mes de xullo.
AÂ CGT ten convocado Asembleas de traballadores e traballadoras en todos os centros de traballo para decidirmos colectivamente as medidas a levar cabo. Animamos a todos e todas a asistir e participar. Read More
Atento presenta un ERE que afectará en 15 centros, entre eles o da Coruña
Esta mañá, 26 de xuño, a empresa do telemarketing Atento presentou un ERE que afecta a 15 centros de traballo no estado español, entre eles o da Coruña. A única información que facilitan é que vai afectar ao 9% do panel de traballadores e traballadoras, e que o período de consultas se iniciará o vindeiro 3 de xullo.
O motivo alegado pola empresa é que a compañía sofre unha «importante deterioración de resultados debida fundamentalmente aos seguintes factores: 1. repatriación ou localización (volta do tráfico a España), 2. a perda de volume, e 3. a caída de marxes».
Para a CGT é aberrante, vergonzoso e incomprensible que un dos argumentos de Atento para este ERE, que pode supoñer unha perda de preto de 900 postos de traballo, sexa que hai máis traballo en España pola volta dos servizos de atención. En canto á perda de volume e a caída de marxes, son produto das nefastas condicións que negocian con Telefónica-Movistar e o seu afán por aumentar os seus beneficios.
Dende a última reforma laboral, os EREs xa non se negocian en cada comité de empresa, senón que se constitúe unha comisión negociadora formada por 13 membros elixidos entre os sindicatos con maior número de representación nos centros afectados polo ERE. Será na primeira reunión, do día 3 de xullo, cando empecen as negociacións, que teñen un prazo máximo dun mes, e cando notifiquen o número exacto de afectados e afectadas, e os criterios que pretenden seguir.
A CGT poñerá todos os medios ao seu alcance para parar esta situación e impedir que a especulación de Bain Capital na bolsa de Nova York, e a avaricia de Telefónica-Movistar e Atento sexa pagada polos traballadores e traballadoras.
A CGT participará na manifestación en Ferrol contra os recortes en Correos
Os compañeiros e compañeiras da CGT en Correos participarán na Manifestación en protesta polos recortes de postos de traballo que ten previsto levar a cabo a empresa.  Esta mobilización está convocada pola plataforma de carteiros de Ferrol para o vindeiro día 26 de xuño, ás 19.30 horas, con saída dende a praza de España. Correos pretende, baixo a eufemística expresión de «redimensionamiento», recortar ata un 25 % a plantilla, mediante xubilacións anticipadas e eliminación de postos vacantes que se cubrían ata o de agora con persoal temporal.
Dende a sección sindical da CGT en Correos na Coruña se está a organizar o desprazamento dos compañeiros e compañeiras para participar na manifestación, con saída dende o local sindical da Federación Local da CGT na Coruña (rúa de Simón Bolivar, 89).
Rodear o Parlamento Galego – Marchas da Dignidade 22M
Como xa sabedes, a CGT de Galicia participa na Plataforma Galega das Marchas da Dignidade. Esta Plataforma convoca unha manifestación para o próximo día 21 de xuño, sábado, en Compostela que partirá ás 12 horas da estación do ferrocarril e rodeará o Parlamento Galego. Esta acción é continuidade da Marcha da Dignidade que tivo lugar en Madrid o pasado 22 de marzo e farase en coordinación co resto de Plataformas de todo o Estado, que farán manifestacións similares en todas as capitais autonómicas.
A organización ten previsto viaxar en tren, partindo da estación da Coruña ás 11:20 horas e regresando ás 14:40 horas. No caso de que este transporte non sexa suficiente, se fletarán autocares.
A CGT da Coruña considera moi importante a participación neste acto, polo que fai un chamamento a que vos anotedes, coa maior brevidade posible, para organizar a viaxe axeitadamente (sobre todo, as persoas que prefiran viaxar en tren).
A CGT chama á folga a máis de 15.000 traballadores e traballadoras do telemarketing
O vindeiro luns 23 de xuño os traballadores e traballadoras das empresas Atento e Extel que prestan servizo para Movistar están chamados pola CGT a secundar un paro de 24 horas en todo o estado.
Esta xornada de folga é a continuación dos paros parciais levados a cabo dende o mes de xaneiro por todos os traballadores e traballadoras de ambas as dúas contratas para protestar polas deplorables condicións laborais ás que están sometidos: presión excesiva, acoso, sancións, despedimentos, exhaustivo control do traballo, con constantes auditorías e gravacións indiscriminadas, que se unen a unha constante inestabilidade laboral e uns salarios moi baixos. A territorialización dos servizos de atención de Movistar trouxo unha falsa imaxe de proximidade, porque en teoría se atenden as chamadas dende sitios próximos ao lugar de residencia dos clientes, pero á vez unha precarización das condicións laborais de todos os traballadores e traballadoras do sector, xa que o que antes se atendía en plataformas situadas en países con salarios moito máis precarios, agora ha de ser atendido dende España ao menor custo posible.
Ao longo deste mes de xuño, fóronse sumando máis sindicatos a esta convocatoria. Na Coruña todas as forzas sindicais presentes nos centros de Atento e Extel manifestaron o seu apoio á folga do día 23.
Coincidindo coa xornada de folga, a CGT convocou unha manifestación ás 12:30 horas que partirá dende Atento, situado na rúa Juan Florez 80- 82, á que están chamados todos os traballadores e traballadoras.
Mobilización dos traballadores e traballadoras de Correos na Coruña
Os traballadores e traballadoras de Correos na Coruña están chamados a secundar una concentración diante da Unidade de Reparto 2 da Coruña, no barrio dos Maios, a partir das 9 horas do día 3 de xuño.  A mobilización está convocada polo Comité de Empresa e a Xunta de Persoal para enfrontar os recortes de persoal que a dirección da empresa ten acometido nesa carteiría e que, en principio, conlevará a perda de 9 postos de reparto.