 O venres 19 continuamos coas mobilización contra os despedimentos e os peches sen comunicación ao comité de tres tendas Hiperxel do grupo Iberconsa. Saimos de novo en caravana de protesta dende o hiperxel de Torrecedeira (10:30h)  e iremos ao centro de rúa Urzaiz e remataremos na tenda Hiperxel de Dobrada .
Extel, empresa do grupo Adecco e subcontrata de Telefónica-Movistar presentou unha Modificación Substancial Colectiva de Condicións de Traballo.
O pasado 11 de maio, iniciouse o período de consultas polo que Extel pretende aplicar unha modificación substancial colectiva que afecta a 857 traballadoras e traballadores en todo o estado, sendo na Coruña 334 afectadas e afectados.
Segundo manifesta a empresa, a causa que motiva esta medida, é a comunicación por parte de Telefónica do cambio de horario comercial de atención ao cliente, que pasará a ser de 9:00 a 22:00 horas, de luns a domingo.
Centos de traballadoras e traballadores verán modificados os seus horarios e xornadas, nun sector, o de telemárquetin, caracterizado pola precariedade laboral.
Para a CGT esta medida obedece unicamente a un intento da empresa de destruír traballo estable, que levará implícito o impedimento de conciliación da vida laboral e familiar para aquelas traballadoras e traballadores que se vexan na necesidade de aceptar os novos horarios e quendas expostas.
Ante este ataque á clase traballadora, a CGT, xunto con CIG, convoca unha folga de 24 horas para o vindeiro xoves 18 de maio e unha concentración ás 12:00 horas ante as portas do centro de traballo, no edificio Proa (R/ Enrique Mariñas s/n), en Matogrande.
Sección Sindical da CGT en Extel-A Coruña
A CGT da Coruña convoca concentración, mañá martes, ás 20:00 horas, diante do centro de traballo que a empresa Atento ten na rúa Juan Flórez da Coruña, Esta concentración, está motivada pola sanción de 60 días de emprego e soldo ao compañeiro Alfredo Jorge (Fredie), de Madrid.
Con esta sanción, Atento volve a usar a política do medo contra os que se resisten a tragar co sen "bo facer" laboral. Con este ataque desta empresa experta en precariedade condena ao traballador aínda máis á miseria, provocando que non se podan aumir as facturas mási básicas (aluguer, mantenza, luz, auga, gas, etc.).
Este novo ataque á CGT non vai quedar impune nin vai cambiar nada na acción do noso sindicato, e, por suposto, non nos vai calar.
60 DÍAS SEN COBRAR, TERRORISMO EMPRESARIAL!
TODOS SOMOS FREDIE!
As seccións sindicais de UGT, CCOO e CGT queremos explicar un pouco o esperpento vivido estes días na fábrica de Faurecia, sobre o cal mantivemos un respectuoso silencio ata o seu desenlace, pero visto que algúns non se cansan e sempre teñen un rato para adicarnos unhas pregarias e como temos a sensación que alguén quere vendernos fume… imos aló:
O día 4 de maio de 2017 mantivemos coa Empresa e resto de seccións sindicais a primeira reunión para desenrolar o Plan de accións acordado en Convenio. Nesta xuntanza presentamos un borrador serio e ben elaborado onde se define como debe traballar o mesmo, que é o que tocaba ese día. Para a nosa sorpresa a CIG le, unha vez máis, as "ocorrencias" que presentaron no Convenio, as cales, se pouca cabida tiñan nun Convenio, menos no plan de accións. Pese a elo, a Empresa contéstanos a todos que recollía as propostas e que daría resposta na vindeira reunión convocada para o día 19 de maio.
Pois ben, un rato despois de rematar a reunión a CIG convoca folga por incumprimentos en materia de saúde laboral e ritmos de traballo, dende logo, rachando calquera proceder lóxico de negociación: reivindicar ou solicitar e esperar a que, polo menos, che digan que non para convocar.
Así a todo, nós continuamos ao noso e sen meternos no que facían outros, posto que, ao igual que nós dixemos que seguiriamos a nosa propia axenda e actuariamos cando o consideraramos oportuno tampouco nos iamos meter no que fixeran outros.
Pois ben, o luns 8 de maio fomos chamados a unha reunión coa Dirección e 2 Directivos de RRHH de Faurecia a nivel España, na que pretendían convencernos de que sacaramos un comunicado condeando á folga e de que acudiramos a unha reunión que ía haber o día seguinte na delegación de traballo coas seccións sindicais convocantes da mesma para chegar a un acordo… Obviamente negámonos ante ambas posibilidades porque, en primeiro lugar, entendemos que, por moi mala relación que haxa, non é cuestión nosa criticar unha acción que tomen contra a Empresa, e, en segundo lugar, porque non tiña nin pés nin cabeza. A seguir valoramos a situación, en canto a saúde laboral, e reiteramos que o reforzo de loxística non pode ser retirado unilateralmente, debendo permanecer como ata o de agora ata que no plan de accións se lle atope un novo posto ou se lle dea máis carga de traballo. En concreto, centrámonos na primeira posibilidade, suxerindo a creación dun posto novo de aprovisionamento de caixa kitting para respaldos liña 1, o cal podería mellorar a ergonomía desta liña e repercutir beneficiosamente na restructuración global de tarefas entre coxíns e respaldos e loxística asociada. Ademáis, instamos, unha vez máis, á Empresa a actuar sin maior dilación en rebaixar as alturas dos retornos de loxística liña 1, posto que hai espazo ocupado por dinámicos baleiros ou infrautilizados que pode ser utilizado para redistribuir o resto de mercadoría de xeito que se poidan habilitar retornos máis ergonómicos.
Así chegamos ao 9 de maio, onde estes representantes da CIG e da CUT, preocupados pola saúde laboral, sobre todo, pola "súa", reuníronse cos que consideraban "ilegal" a Folga. Pois ben, despois de varias horas de dura negociación chegaron a un acordo que solucionará a Saúde Laboral e os ritmos de traballo "dunha hostia dunha vez". En versión telegráfica, os "compañeiros" conseguiron 2 bloques: o bloque 1 e o bloque 2, e, en versión extendida, crear un Grupo de Traballo que, ao parecer, está no artigo 29 dalgún Convenio no que se analizarán e acordarán a viabilidade dunha serie de puntos, é dicir, que xa lles contestarán, como lles dixeron o 4 de maio.
Polo demáis, dicir que os que tachaban o plan de accións de parche non nos van impoñer nada, nós seguiremos co noso calendario e coas nosas propostas, e non imos permitir que as "ocorrencías" e "caprichos" de ninguén poidan adiar ou entorpecer o normal funcionamento do PLAN DE ACCIÓNS, o cal, QUEREMOS QUE FUNCIONE E SIRVA PARA MELLORAR A SAÚDE DOS TRABALLADORES E TRABALLADORAS DESTA EMPRESA.
O próximo 12 de maio a CGT convoca a tod@*s @*s traballador@s de Unipost en Galicia a participar e dar visibilidade aos problemas que están a sofrir, cunha nova MARCHA LARANXA que comezará as 20:00 horas na Subdelegación do Goberno e percorrerá as rúas de Ourense, e que será a CUARTA tras as xa realizadas en Santiago de Compostela, Pontevedra e A Coruña. Por iso, pedimos a participación de tod@*s a este acto reivindicativo e onde sacaremos á rúa os atropelos de Unipost cara ao seu persoal.
Comité Local CGT Ourense
As Marchas da Dignidade, das que forma parte a CGT, volven a Madrid o día 27 de maio. Unha vez máis, encheremos as rúas de Madrid para manifestar o noso rexeitamento da situación actual, para reclamar a derrogación da Reforma Laboral, para pedir a liberdade de todos os condenados por protestar e o sobreseemento dos procesados e sancionados, para reclamar rendas suficientes, para esixir traballos dignos en condicións dignas, para volver berrar PAN, TRABALLO, TEITO E DIGNIDADE.
As Marchas de Galicia conseguiron negociar que haxa tren a Madrid. Está prevista a saída ás 07:50 horas da Coruña, pasando por Compostela (saída 08:20) e Ourense, de onde sairá ás 09:00 horas, con chegada ás 14:00 horas a Chamartín e volverá á noitiña, con saída de Chamartín ás 22:00 horas. Para os compañeiros de Ferrol, Lugo, Pontevedra e Vigo haberá autobuses que os achegarán ás estacións do tren.
Para que isto sexa posible é imprescindible encher os trens e hai que facelo antes do día 20. Hai que pagar todas as prazas, se ocupen ou non, polo que levar o tren medio baleiro sería inviable.
Consideramos que é unha oportunidade única para levar a Madrid os problemas dos sectores e das empresas, onde nos encontraremos con compañeir@s do resto de España, tanto da CGT como doutros movementos.
Para anotarse, están hábiles os teléfonos seguintes:
Os afiliados da CGT, nos locais do sindicato.
O DÍA 27, TOD@S A MADRID!
UNIFICANDO LOITAS!
PAN, TRABALLO, TEITO, DIGNIDADE E IGUALDADE!
En Marea anuncia a intención de levar a cabo unha moción de censura contra o executivo do Partido Popular tras os últimos acontecementos relacionados coa corrupción política e xudicial
Tras a petición de reunión de En Marea, a Confederación Xeral do Traballo de Galicia (CGT) acudiu na tarde de hoxe ao Auditorio de Galicia para ser informada da proposta de moción de censura que están a promover contra o goberno de Mariano Rajoy.
CGT agradece a deferencia e escoita con atención as explicacións que xustifican esta iniciativa política pero, á vez, pon de manifesto que a forza transformadora da sociedade está na loita da xente e non no parlamentarismo. CGT considera que non se pode abandonar a mobilización porque é a única garantía para transformar o modelo social e recuperar as conquistas que nos foron arrebatadas nos últimos anos.
Do mesmo xeito, CGT expuxo a nosas reivindicacións máis importantes nestes momentos, como a necesaria e urxente derrogación das dúas últimas reformas laborais (PSOE e PP), a derrogación das leis "mordazas", a garantía dun Sistema Público de Pensións, a defensa dos Servizos Públicos e do Común como dereitos esenciais das persoas, a anulación dos procesos penais e administrativos de todas as persoas represaliadas por exercer o dereito á protesta e, por suposto, a recuperación do poder adquisitivo da Clase Traballadora.
Por outra banda, é evidente e totalmente noxenta a trama de corrupción que estableceu o partido gobernante actual, polo que esperamos que a maioría social reaccione coa mobilización na rúa para botalos, o que non desculpa os episodios de corrupción de gobernos anteriores, de gobernos autonómicos e municipais igualmente noxentos e delituosos.
Calquera iniciativa que vaia na dirección de botalos non será rexeitada pola CGT, só que cremos que é a resposta da sociedade no seu conxunto, coa mobilización colectiva, a que debe ser o motor do saneamento que se pretende e que CGT entende como urxente e necesario.
A reunión transcorreu con parámetros de cordialidade e respecto mutuo.
Compostela, 02 de maio de 2017
Este venres 5 de maio temos concentracion diante do Hiperxel (Iberconsa) de dobrada ás 11h polo peche de tres tendas sen previo aviso e o despedimento de tres traballadoras. A patronal desta empresa esta presionando para que as traballadoras asinen as liquidacións, citándoas ás agachadas , de noite e nos locais pechados onde non hai nin luz.
A CGT chama este 1 de Maio a todas as persoas, organizacións e colectivos sociais, ás persoas migrantes, ás pensionistas, ás estudantes, ás mulleres, ás desafiuzadas das súas casas e dos seus empregos, ás represaliadas por loitar, á clase traballadora en xeral, a Manifestarse desde a dignidade de clase para exercer o dereito á protesta que pretenden eliminar, a través de Sentenzas condenatorias para quen loita e Sentenzas do máximo tribunal español (o Tribunal Supremo), que legalizan o esquirolaje empresarial cando as persoas traballadoras convocan Folgas para defenderse das agresións empresariais.
Esiximos neste 1 de Maio:
✔ï¸A derrogación das dúas últimas Reformas Laborais
✔ï¸A derrogación das leis Mordaza e a Amnistía Social para todas as persoas encarceradas, procesadas, despedidas dos seus empregos ou multadas por loitar.
âœ”ï¸ A Renda Básica como garantía de supervivencia
✔ï¸O Non rotundo ao pago da Débeda ilexítima.
✔ï¸Os Servizos Públicos como Dereitos Esenciais das persoas
✔ï¸Empregos estables con salarios e condicións dignas.
O 1 de Maio a CGT esta nas rúas, en confluencia cos movementos sociais e colectivos en loita ou coas súas propias enerxías e xentes, reivindicando un cambio de modelo social baseado na repartición da riqueza, o apoio mutuo, a igualdade e a autoxestión.
Vémonos o 27 nas marchas